عبدو الثقافي
كتبت الشعر
و بالدارجة ..
لغة الصدق و الصفا
من هذ الروح
كتبت البوح
حينت مزوجاني
لا لة الكلمة..
وفي زواجها
ماطلبت مني صداق.
تلاقينا بالنية
عطاتني عاهد الله
وصاتني وصية
الى ولدتي لقصيدة
صونها بصدق المعاني
لاتشيطها لعدياني.
تلفت ليها
شفت في عينيها
عديان لحرف
شادين الصف
شي عادي السلام
وشي مگرضف
شي دا وجاب في ليام
على لغذر يحلف.
رمشات ترميشة
بانت ليا فرقة
مقسمة لفريقات
فرقة دايرة الحلقة
وفرقة دايرة الضحك
فرقة رابحة فرقة
وفرقة ما عندها فرقة
تبرح بالمسروق .
وفرقة مغمسة المرقة
وفرقة باغية تفرتك السوق
وسط عينيها
حملت بلقصيدة
حسيت بيها
تزاحموا في الجوف
شلا معاني و شلا حروف
من حر لوجع
باغية تخرج قصيدة
تعبر على هذ الحال.
كتبت البوح
خارج من هذ الروح
بالدارجة الكلمة مراتي
ما نخون عاهدها
وهي حياتي
حروفها خارجة من ذاتي.
عبدو الثقفي
