أخر الأخبار
الرئيسية » اخبار » واش الشماعية معندهاش رايس ديال الجماعة ؟؟؟

واش الشماعية معندهاش رايس ديال الجماعة ؟؟؟

 

اسيادنا كولو ليا واش الشماعية عندها شي رايس او معندهاش ؟

المسؤولين واش نتوما عارفين هاد خينا كايجي الجماعة غير الوقت اللي كالها ليه راسو؟

الوزير الوالي العامل واش فخابركم البيرو ديالو ديما مسدود من نهار اللي انتاخبوه رايس وعمرو ما تحل؟

واش فخابركم راه الناس في الشماعية مكتعرفش هاذ الرايس حينت اللي بغاه ما كيلقاهش ؟

اسيادنا واش ما كاينش القانون في البلاد حتى يدير فينا وفي البلاد  هاذ المخلوق اللي كاليه مخو؟

واش فخابركم ان هاد الرايس ظل مختفيا بحال الى  المصالح الأمنية كتقلب عليه ؟

هاد الرايس المنتخب ملي ولى رايس عمرو ما عقد شي ندوة صحفية باش يكشف على برنامج تأهيل المدينة والمشاريع المرتقبة ّ؟

واش فراسكم ان هاد خاينة صبح شر خلف لشر سلف ؟

واش فخابركم هاد خاينة حول الشماعية الى جنة من الوعود الكاذبة ، وتبخرات وتبخر معاها هاد الرايس ملي ولا رايس وبقاو المواطنين كيقلبو عليه وهو مخبي ؟

السي الرايس الظاهرة سكان الشماعية كيقولو ليك ، غا كد بالمهمة ولا سير فحالك خللي الجماعة اللي عرفو ليها راك ما كادش عليها ؟

اهاد خاينة راك قتلتينا بالكدوب بسياسة التسويف اللي عطلتي  معاها مصالح المواطنين والمدينة ؟

السي الرايس راك وقفتي عجلة التنمية بالمدينة وخاصك تحاسب على هذا الشي؟

اسيادنا المسؤولين راه الشماعية كتقلب على رايسها المختفي ؟

واش المسؤولين ما بغاوش اتصداو بحزم وصرامة لهذا الرايس الشبح الذي يعطل مصالح الإدارة والمرتفقين ويعيق الاستثمار ويضر بالمصلحة العامة؟

وأخيرا نطالب بإعمال المسطرة التاديبية في حق هذا الكائن الانتخابي ، بإهماله وتقصيره ومخالفته للنصوص التشريعية والتنظيمية المعمول بها .