سيدي بوفكران
سيدي بوفكران مضحك وفاقس قومان
ديما ناشط وفرحان
كيف الحكومة كيف البرلمان
سيدي بوفكران ماجاد مثله زمان
سيدي بوفكران ماجاد مثله زمان
انعس وحلم وفاق
قال ليهم:عندي لكم بلان مزيان
ينجينا من الميزيرية يالخوان
الحمد لله كلشي فرحان
العمال نزيدهم في الثمن
والفلاحة صايفوا هذا العام
المهم نصدروا بركوكش للطليان
سيدي بوفكران مايعرف غير راسو
ومن بعده الطوفان
كلشي عنده عديان
كيفرق الاتهامات بالمجان
يصول ويجول ومنشط البرلمان
ساعة ساعة يقول نكيثة
يضحكوا عليها قومان
ماكاين فرح غير ندوزوا الوقت وكان
هذا كلام سيدي بوفكران
غير نسوا الهم شوية
ماطفروا فلان وفلان
هذا كلام سيدي بوفكران
غير نسوا الهم شوية
ماطفروا فلان وفلان
وهذه حكاية سيدي بوفكران
يحكوها العكايز للصبيان
حكاية ماليها ثمن…….
يحكوها العكايز للصبيان
حكاية ماليها ثمن…….
الكيحل نورالدين
