الرِّيح السابع
يا مولايْ
يا مُولْ المَا
خَلِّيني نَبْكي
وُ نَنْدَبْ
يا مولايْ
يا مولْ
الما
الما
جيبْ الگرْبَة
اطْرُشْني بْ الما
عْطيني لْكُلْ حَرفْ مَنْ حْرُوفي
غُرَّافْ
وُ عْطيني غُرَّافي للحْمامَة
تْرُشْ ابْوابْ العَتْبَة
بْ سَبْعَة
تْرُشْ جْنابْ القُبَّة
بْ رَبْعَة
وُ تْرُشْ
گاعْ حُضَّارْ الزْريبَة..
جيبْ الگرْبَة
اطْرُشْني بْ المَا
وُ خَلِّيني
نَلْعَبْ نَجْذَبْ
نَلْعَبْ نَجْذَبْ
نَجْذَبْ
نَجْذَبْ
بْ راسي عَرْيانْ
نَدْمي رَجْلي
بْ الَحْفَى
نْخَلِّي شْموعي ضاوْيَة
ما تَطْفَى
بِها لَمْحَلَّة
تَدْفَ
نْخَلِّي الميزانْ
يَطْلَعْ
يَحْمَى
نْخَلِّي ناسي
فْ هاذْ الحَضْرَة
تَجْذَبْ
تَجْذَبْ
وُ تَذْبَحْني
إلا عْطيتْ بْ الگفَى
تَقْراني
وُ تَتْعافَى..
الرِّيح الثامن
ماني مَلْك
ماني گناوي
ماني عيساوي
ماني جيلالي
ماني مْعَلَّمْ
غيرْ مَصْراني
بوحْدُه
تَبْرَمْ
وُ جَلْدي
بْلا تَسْخانْ
سْخَنْ
يَدَنْدَنْ
دَنْ دَنْ
دَنْ
دَنْ
دَنْدَنْ يا سَلْطاني
دَنْدَنْ
الحَفيظْ الله
المَعْبودْ الله
آ مولْ النُّوبَة
الرِّيح التاسع
يا ميموني
لَحْمَرْ
هَزّ لَمَّاسْ
بْدا تَتْحَيَّر
جَدَّدْ لَوْضو
حَدَّدْ لَمْضَى
مَنّي أنا بْدا
شَرَّگْ لَبْطَنْ
مَنّي طْلَعْ مَنّي
لحزن
طَلَّعْ مَنّي شيطاني
خَلِّيهْ
يَگرْ
وُ كَفْ
بْ سَلْسولْ
يَحْمارْ
يَحْمارْ
فْ وْجَهْ
الرِّيحْ
الرِّيحْ
يَوَڤَفْ
لَخْيَمْ
جيبْ المَخْزَنْ
جيبْ لَخْدَمْ
شَعَّلْ الشْموعْ
فْ وَسَطْ
المَنْجَمْ
المَنْجَمْ
عَمَّرْ لَمْجامَرْ بْ الفاخَرْ
وُ عَزَّمْ
هَرَّسْ لَخْدايَمْ
طَلَّعْ لْويزْ
وُ جوهَرْ
آرَى لَحْليبْ..آرَى الثمَرْ..
آرَى الوَرَدْ المَدْگوگْ
آرَى الخبزْ لَمْكَسَّرْ
آرَى المَسكْ وُ لَبْخورْ
وُ رُشْ
رُشْ النَّاسْ
بْ دَمِّي
ما هُو دَمْ
لَغْدَرْ
رُشْ النَّاسْ
بْ جَلدْ
لوبَرْ
رُشْ النّاسْ
بْ مَلحْ
لَبْحَرْ
رُشْ مَنْ دْوايْتي
بْ القَطْرانْ
الخاثَرْ
رُشْ
مَنْ صْدَرْ
لَمْعَلَّمْ
لَمْعَلَّمْ
بْ لُودَعْ وُ لوبانْ
بْ لَبْلوحْ التّامَرْ
رُشْ
مَنْ صْدَرْ لَمْعَلْمَة
بْ ضْرَعْ لَحْليبْ
وُ الجّمَرْ الزّاهَرْ
وُ رُشْ القَطْراتْ
مَنْ دَمّي
نَغْماتْ
تَتْقاطَرْ
طَنْ … دَنْ … دَمْ
طَنْ… دَنْ… دَمْ
طَنْ… دَنْ… دَمْ..
دَنْدَنْ
يا سَلْطاني
دَنْدَنْ
