المجموعة الثالثة من قصائد عبد الرحيم الثقفي الزجلية…يتبع…

ماأنا بوسخ
الدنيا ملهوف
ره مسكون.. هذ الجوف
ساكنه زايزون.. لسانه موقوف 
هازاه الجدبة
في رحبة لكتبة
بين مواج لخوف
جارني نغوص
في بوح لحروف…

لمزلوط في هذ
لبلاد
تجبد حتى عيا(ء)
ومات!!!
مات واكَف
واكَف مسكين
ومات!!!
مات وباقي 
واكَف!!!
وكَف حسكة
يغدي الجوع
من شواية لفقيi…..

دار الزحام
على سبولت لحروف
ولاهو…عبار
ولاهو…كيال
في رحبة لمعاني.
الله إيرد به
كَولوا ااَمييييين.

أودي مالك
يابنادم
مضيتي مضاوت لبرا
المعقول فيك 
ضربها بغبرة
ولكريدي مكيلوا
وقيلة بلا عبرة.
….

لـي ما يتكلم 
راه معلم
كيتصنت
يدي فايدة
بين النهار 
والليلة
راه السكات حكمة
وبنادم فيه قليل الحيلة..

شهدك ياسلطان لحروف
عند لملمة عاد مكروه
وسط سوق البرغازة
ولى عيفة
مع ملين الجبوه

ملي تبليت بحب
الشعب
ولات عيني ساهرة الليل
تكَول: للنهار فارق
وليت سارح ونعانق
كل مهموم
وسط دموعه غارق..

حلمي… نشريه
بملكي…ومالي
حلمي…لويز وغالي.
بالله عليكم
خلوني نحلم..
…
….
راه خاص شلا
وبلاوالي.

خممت مزيان
لقيت لعقل لانبة
بلا ماتشعل
في فتيلتها لوقيد
مضوي…

تويشية رقم 13

دارت لرض على
الشمس
دارت الشمس على الكَمرة
حداث الظلمة..
ودارت الوقت وسط لعرب
دورة الواد ملي يحمل
والماضي في السمار
يحني راسه
حتى إيدوز الكرط..

تويشية رقم16

هاذ الربيع اخرف
واقيلة اَشرف
دار لحية ثلف
رون كلشي
بدا يقدف…
…

مالنا
!!!
مالنا في السوق..
….. …. والبطوار
مالنا في الصنك..
…. …. والإيجار
مالنا في الثراب..
…. …. ولغمار
مالنا في لمراسي..
…. …. ولمطار
مالنا في الزيت..
…. …والسكر
مالنا !!!
حزموه بشمار
مالنا داه مخار
ما حشاه لينا
ما دخلنا لشوار.
أودي مالنا
ما نتصرنا
ما تقصينا
ما خدنا قرار
ما كَلنا مالنا؟؟؟؟

نسميك يا با سفي
زهرة لحروف
الصادقة في السمايم
والليالي
كلمة لحصبة
طالعة من الجوف
عبدية هي
ساكنة بالي
نمشي ليك ملهوف
للالة فاطنة
نشكي هبالي…
…
….

قضيتنا قضية
ريفنا لتحتاني
تمارة من الصباح
حتى لعشية
والريف لفقاني
نشاط وأفراح
وليالي الحلمية
قضيتنا طبقية..

عبد الرحيم لقلع / من قصيدة / الراس بحر