منار اليوم – جريدة شاملة مستقلة
المجموعة الرابعة من قصائد عبد الرحيم الثقفي الزجلية…النمل في الغابة…..
آ النمل في الغابة
كيعيَّط أبابا ….
شري ليا قشَّابة
باش نعيَّد نهار العيد.
عيينا اَه ياوين عيينا
من شلاَّل لقراجط
وسكات…..
لكراح لعبيد
غادي بينا
ملينا اَه ياوين ملينا
مانسوْكوا للجبال
بقشور الكركاع
وجدور الصَّفصاف
لا وجه تنقى!!!
ولا ديالنا بقى!!!
وملّي فاخرنا اَزهر
طار الطَّفطاف
وسط الغابة
ساكـ اليابس
ساكـ لخضر
لا الواد طفاه…
لا لبحر.
طال هذ الظلام
أوعكل علينا لفجر.
عيينا اَه ياوين عيينا
شري ليا قشَّابة
باش نعيَّد نهار العيد.
عيينا اَه ياوين عيينا
من شلاَّل لقراجط
وسكات…..
لكراح لعبيد
غادي بينا
ملينا اَه ياوين ملينا
مانسوْكوا للجبال
بقشور الكركاع
وجدور الصَّفصاف
لا وجه تنقى!!!
ولا ديالنا بقى!!!
وملّي فاخرنا اَزهر
طار الطَّفطاف
وسط الغابة
ساكـ اليابس
ساكـ لخضر
لا الواد طفاه…
لا لبحر.
طال هذ الظلام
أوعكل علينا لفجر.
عيينا اَه ياوين عيينا
من شلال لقراجط
وسكات..
لكراح لعبيد
غادي بينا
عنكنا لقهرة بمحبتنا للثراب
درنا الصف….
حينت بغينا الصواب
تبخرات حلامنا
وخيرنا لكطو لغراب
وحنا عبيدات النْمل
كل نملة فينا
تكابر…
مع الكمحة تتعافر…
وسط هذ الشوطة
تلكط لعوين…
هذ لعوين اَه ياوين
ثقيل هذ لعوين
قليل هذ لعوين
اَه ياوين.
هذ لعوين قليل
وجوعه كافر…
عليل هذ لعوين
اَه ياوين !!!
هذ لعوين عليل
والنمل معه يترطّى
في الجبال… ولوطا…
وسكات..
لكراح لعبيد
غادي بينا
عنكنا لقهرة بمحبتنا للثراب
درنا الصف….
حينت بغينا الصواب
تبخرات حلامنا
وخيرنا لكطو لغراب
وحنا عبيدات النْمل
كل نملة فينا
تكابر…
مع الكمحة تتعافر…
وسط هذ الشوطة
تلكط لعوين…
هذ لعوين اَه ياوين
ثقيل هذ لعوين
قليل هذ لعوين
اَه ياوين.
هذ لعوين قليل
وجوعه كافر…
عليل هذ لعوين
اَه ياوين !!!
هذ لعوين عليل
والنمل معه يترطّى
في الجبال… ولوطا…
وتحت الحافر..
لدواير الزمان إيوفَّر
لدواير الزمان إيوفَّر
وسط حكام فدغل
إيزكّي… وإيكفَّر…
إيزكّي… وإيكفَّر…
وملّي يجمع الصّابة
تجي أنت ياحيّاح الغابة
وتفرَّقها على عصابة
لحّاسة… زلاّكة …
وقيلة برغازة.
بالحلوف تهزها ثقلة
على كتاف لحمير.
عيينا اَه ياوين عيينا
من شلاّل لقراجط
وسكات…
لكراح لعبيد
غادي بينا
راهم … راهم…
تجي أنت ياحيّاح الغابة
وتفرَّقها على عصابة
لحّاسة… زلاّكة …
وقيلة برغازة.
بالحلوف تهزها ثقلة
على كتاف لحمير.
عيينا اَه ياوين عيينا
من شلاّل لقراجط
وسكات…
لكراح لعبيد
غادي بينا
راهم … راهم…
راهم كلاووو…
راهم … راهم…
وشكون معاهم؟
ولاحد احضاهم
راهم داووو…
داووو…
وحتى حاجة ماخلاّووو
اَه ياوين!!!
اَه ياوين!!!
وشكون معاهم؟
ولاحد احضاهم
راهم داووو…
داووو…
وحتى حاجة ماخلاّووو
اَه ياوين!!!
اَه ياوين!!!
ساكونا للريتول..
خلاّونا نشوا همنا على الجهل
بقاينا بلا عقل
وسط خيمة لمدغول
بقاينا بلا عقل
وسط خيمة لمدغول
خلاّّونا وسط هذ لغابة
مع التماسيح
مع العفاريت
والغول…
لاضحكنا بقى مسكم
ولا غواتنا بقى يتفهم
وحتى ربيعنا
تسقى بالدم
اَه ياوين!!!
اَه ياوين!!!
مع التماسيح
مع العفاريت
والغول…
لاضحكنا بقى مسكم
ولا غواتنا بقى يتفهم
وحتى ربيعنا
تسقى بالدم
اَه ياوين!!!
اَه ياوين!!!
راه حنا عبيدات النمل
الضعف فينا اَجفل
ملّي رضعنا من بزولة لخاوي…
مراير الذل
سلمنا كثافنا
لشتيف الفيل…
لشتيف الجمل…
حتى باعوا القرد
ودلكناه مع لي شراه.
ياحيّاحْ لغابة
الضعف فينا اَجفل
ملّي رضعنا من بزولة لخاوي…
مراير الذل
سلمنا كثافنا
لشتيف الفيل…
لشتيف الجمل…
حتى باعوا القرد
ودلكناه مع لي شراه.
ياحيّاحْ لغابة
رد طيرك على فراخ لحمام
ياحيّاح الغابة
فك أحلامنا بالخير والسلام
ياحيّاح الغابة
راه ظهر خيولنا . . .
فك أحلامنا بالخير والسلام
ياحيّاح الغابة
راه ظهر خيولنا . . .
محتاجة لرامي علاَّم
اَه ياوين!!!
اَه ياوين!!!
حطبنا في الليالي
ما دفينا…
ما دفينا…
درنا شلا وبلا والي
ما علا لينا مقام.
ياحيّاح الغابة
حوزنا في الرخا
حوزنا في الدفا
كبل ما الجلد يكسا
وجنابنا إيموتوا
علينا من كثرة لعصا..
ونكطعوا لكلام.
آه ياوين!!!
اَه ياوين!!!
نهارنا ظلام
وحتى عودنا
ما علا لينا مقام.
ياحيّاح الغابة
حوزنا في الرخا
حوزنا في الدفا
كبل ما الجلد يكسا
وجنابنا إيموتوا
علينا من كثرة لعصا..
ونكطعوا لكلام.
آه ياوين!!!
اَه ياوين!!!
نهارنا ظلام
وحتى عودنا
بقى بلا لجام
وحتى لعلاّم
شعل الشيب في راسه
من كثرت التخمام
اَه ياوين!!!
اَه ياوين!!!
ثقال هذ لحمل
وحنا عبيدات النمل
كدحنا الليل والصباح
نذبنا ظيمنا بالسكات
ملى بح فينا النواح
شعل الشيب في راسه
من كثرت التخمام
اَه ياوين!!!
اَه ياوين!!!
ثقال هذ لحمل
وحنا عبيدات النمل
كدحنا الليل والصباح
نذبنا ظيمنا بالسكات
ملى بح فينا النواح
اَه ياوين!!!
اَه ياوين!!!
اَه ياوين!!!
راه لاتكلم لحمار
وفي فمو لجام
عرفوا راها قهرَة
سنين وعوام
ولاظلَّم النهار
عرفوا قرط الليل
خلَّط لحلال
خلَّط الحرام
وطلع بومقيص برّاح
إيصول في الغابة
إيجول ولد لحرام ويتساراح
اه ياوين!!!
اَه ياوين!!!
راه جايب اخبار الناس لملاح
حي على… الفلاح
حي على … الفلاح
وفي فمو لجام
عرفوا راها قهرَة
سنين وعوام
ولاظلَّم النهار
عرفوا قرط الليل
خلَّط لحلال
خلَّط الحرام
وطلع بومقيص برّاح
إيصول في الغابة
إيجول ولد لحرام ويتساراح
اه ياوين!!!
اَه ياوين!!!
راه جايب اخبار الناس لملاح
حي على… الفلاح
حي على … الفلاح
اَح..اَح..
ياحياح
لغابة
على هذ الصلاح.
ياحياح
لغابة
على هذ الصلاح.
ويبقى النمل في الغابة
كيعيط أبابا…
شري ليا قشابة
باش نعيد نهار العيد.
كيعيط أبابا…
شري ليا قشابة
باش نعيد نهار العيد.
زجل عبدالرحيم الثقفي
