منار اليوم – جريدة شاملة مستقلة
قصيدة زجلية للزجال المبدع نور الدين الكيحل ……..واش ندوي ولا نسكت؟
واش ندوي ولا نسكت؟
سكتنا و طال سكاتنا ،حسبونا من الاموات
هضرنا وكثرت هضرتنا،قالوا:فيكم الصداع والغوات
قالوا السكات حكمة،لكن سكاتي مازادني غير نقمة على نقمة
من قديم قالوا:اللي كلى حقه يغمض عينيه
غمضنا عينينا وحقنا ضاع
حسبونا نعاج،وحسبو روسهم سباع……
قلنا للكبير :تقدم وتكلم
ثعتر لسانه بدا يثلعتم
ثعتر لسانه بدا يثلعتم
واش ندوي على العيشة الحارة
ولا على قلة الشيء
والحكرة المداومة
ولا على رجال تقهرات بالحسرة
ونساء ماتت بالقهرة
واش ندوي على مال عام سرقوه الظلام
ولا على ذاك الفاهم ،اللي داروا ليه كمامة ولجام
ندوي وندوي ونزيد ندوي وديي ما يبرد كيتي
الى كتمت وسكت ،نموت بحسرتي…
حاسبين راسهم في غويبة،عيشونا عيشة السيبة
اش نقول ؟خليوني ساكت. واخا سكاتي مادار لي مزية
قولوا لداك المغرور:الركبة ماتدوم
نخليها ليك وصية
غدا يتبدل الحال
وتبقى في القلب كية.
واش ندوي ولا نسكت؟؟؟ …….نورالدين الكيحل…..
