المجموعة السادسة من قصائد عبد الرحيم الثقفي الزجلية …قصيدة حوش لكلمة..يتبع…

بعد ماكان
لفم سخون
عليه شلا
عساسة.
ليوم اللسان
برد
بين لكثاف
تغطس الراس
تحسبنا مع النعاسة.
نعسنا!!!
في نعاسنا
فاقوا لبلحاسة.
تبلحسوا للريح
عطاهم حلاسة..
نهار تكَلبنا!!!
جا البرد رشنا بالما
مافقنا!!!
ماعقنا!!!
ماكَلنا حتى كلمة
الضرب فينا بالترداف.
ماحسينا!!!
مابكينا!!!
بردو علينا لكثاف.
مادوينا!!
ماندهنا لي ماعاق بروحو
تعطيه رصاصة تلوحو…
…….
…….
عبد الرحيم الثقفي

اش نعاود
ليك؟
شدوا
لكراسة
وبكاو
شعب.
في الضو
زادوا
زادوا في
الما
زادو في
النعمة
زادونا
غمة
على غمة
بدلوا
النغمة
زادونا
تعب
في تعب.
*
اش نعاود
ليك؟
لاقراية
في المدرسة
من غير
ترابي الزنقة
وكلام
لحلقة
والكتبة
على الورقة
فوق
طابلة كَع مشقة.
هاذ
التلميذ داخ
ماعرف اش
غادي يكتب؟
*
اش نعاود
ليك؟
قسمونا
فرقة فرقة
فرقة دات
فرقة
وفرقة
بقات بلا فرقة
وحتى
فرقة
ماعندها
ساعة محقة
كل شي
علينا يكذب.
*
اش نعاود
ليك؟

2
من راسك
اَحضي ياولدي
راه دار
البارود
مابقات
تعطي
وحتى
عيوط لحركة
وديك
الجدبة
فقدات
لنغام.
هرَب
المعنى من فم
دواية
لفهامة
قلب
الراس على عكَبة
لازغاريد
بقى
لاصلى
على سلام؟
* * * * *
يابويا….
ياشيخ
لكلام
انت عشتي
لزمان

3
وأنا
لزمان
هذا زمان

وذاك
زمان
زمان ..
ماهو بحال زمان
زمان ..
مايشبه لزمان
تخلطو
السربات
لامحرك
بقى
لاتحنحين
لعَود
لاصهيل
العودات.
رشَى
تشمير
حرير
الدودة
مابقى
لكَى
حر
السمايم
ولا كَز
لبرودة.

4
معاني
كلام زمانك
تصرفوا
تحاجي
عادوا
خبير
إيضحك
لولاد
وقيلة
حتى صاريه
في مزان لفهامة
تعكف
مع كفوفو
عاد
شاد
لعناد.
زمان
الخبيرأبويا
مشى مع
الواد
وداوه
لجواد.
* * * *
ياولد
من شية
لكبدة

بغيت
نوصيك
نسكت ولا
نبدا؟
راه
الموت فراقة
وجات على
جنب الطريق.
في زمانك
مع
كَرانك
شد لسانك
لاتكَول
كلامك
حتى
تعبرو
لاتهز
على كثفك
من غير
قدرو..
وياك
تكون
من دوك
الناسين
معاني
لوصيات

6
خوفي
عليك
من عكَيد
صرة البوط
وقت
وحايل لعفطات.
خوفي
عليك
من ودنين
الليل
لي ردوا
الراكب دليل
حتى
عافوه لخيل؟
خوفي
عليك
من ضربة
الطير
لولد
لحمام.
خوف عليك
تشرك مع
من والى لكلام
شحال من
وجوه كثيرة تجيك
على طول
الدوام.

7
شي إيجيك
بعلامو
شي إيجيك
بلطامو
سي يعطي
سلامو
شي يقتل
وإيكَول:
الدفين
لا.
شي إيجيك
بالحس
وإيكَول:
لغوات لا.
زمانكم
اولدي مَعناد
بعنادو
عمل
راسو
سلطان
إيخاوي
لمحبة مع لخاوة
فين غادي
ياولدي؟
راه
لمحَبة ماعَمرها
تأصلات
من لعداوة.
عبد
الرحيم الثقفي