قصيدة زجلية للزجال عبد الرحيم لقلع بعنوان………..الراس بحر

webmaster 17 أبريل، 2015 اضف تعليق

ساوي ساوي

يا الكناوي ساوي

ساوي ساوي

يا لَمْعَلَّمْ وُ زيدْ ساوي

خَلِّي السَّنْتيرْ يَوَنَّسْني

هاذْ الحالْ شْحالْ هَوَّسْني

خَلِّي السَّنْتِيرْ يَحْكي وُ يڤولْ

عْلى مْحايَنْ لَعْبيدْ

كْبُولَة وُ حْديدْ

وُ سْلاسَلْ في لِيدْ

مَنْ بْلادْ سَلْطانْ لَكْحَلْ جايّينْ

لأرَضْ غْروبْ الشَّمَسْ قاصْدين 

وُ قْوافَلْ الملَحْ شاهْدَة عْلى هاذْ الجُرَحْ

وُ سيرَة مَكْتوبَة بْ دْموعْ وُ دَمّ

كُلْها كْواوي حُگرَة وُ غَمْ

وُ ليلْ ما لُه نْهايَة مْخاصَمْ لَفْجَرْ

لَعْرَى يَفْضَحْ الشَّحَطْ وُ يَعْطيكْ لَخْبَرْ

العَرَسْ فِيَّ لامَتْهُمْ عْزُو وُ فينْ الفَرَحْ

وُ سْمَعْ لَمْعَلَّمْ يَدَنْدَنْ وُ يَعَيْدَدْ

إلا كُنْتِ مْطَرْقَة دُقْ

وُ إلا كنْتِ وْتَدْ صْبَرْ للدّقْ

هاذْ الدّقْ طالْ وُ طَوَّلْ

ما بْقى يَفيدْ مْعاهْ صْبَرْ

وُ بينْ لَمْطَرْقَة وُ لَوْتَدْ

لَعْظَمْ تْشَق

يا لَمْگنْوي هذا حالي

واشْ نْديرْ ؟

شوكَة فْ الرُّّّوحْ مَدْڤوڤَة

خَطْرَة تَهْدَا

خَطْرَة عْوافيها موگودَة

هاذْ الحالْ ما هَنَّاني

سفينَة بينْ لَمْواجْ ميزانِي

وُ ڤصَبْ الجَذْبَة

وَدْوَدْ مَنْ بْعيدْ وُ ناداني

آجي تَطْفي جْمَرْ لَحْزاني

اللي فيَّ ما بْغَى يَتْهَدّنْ

غيرْ ما زايَدْ فْ ايّامُه يَتْسَلْطَنْ

هُوَ عَلْتي وُ دْوايَ

هَوَ راحْتي وُ شْقايَ 

يا اللايَمْني عْلى هاذْ الحالْ

الدَّنْيا حالْ وُ احْوالْ

وُ دْوامْ الحالْ مَنْ المُحالْ

بغيتْ نحطُّه بالي

وُ تلَبْسيهْ جْديدْ

كِ ثوبْ العيدْ

وُ ذوقْ ما ذاقُوا صْحابُه

اللِّي تْعَجَّبْ يَتَبْلَى

وُ بْ حَرُّه يَتَكْوَى

اللِّي شَتِّيهْ عْلَى شي حالْ خَلِّيهْ

وُ طْلَبْ المولَى يَعْفُو عْليهْ

هاذْ الكِيَّة جاتْ فْ الرَّاسْ

وُ الرَّاسْ بْحَرْ

ما أنا فيهْ عوَّامْ

ما أنا غَطَّاسْ

وُ حْكامْ لَمْلوكْ بْ قْطيعْ الرَّاس

كُلْمَا نڤولْ  بْريت

نَلْقَى راسي عادْ بْديتْ

ساوي ساوي

وُ زيدْ ساوي

شي ڤالْ راني مَجْذُوبْ

شي ڤالْ راني مَسْلوبْ

وُ شي ڤالْ بْهُوتْ مْطَرَّزْ زيوانِي

وُ أنا غيرْ هاذْ المَكْتوبْ بْلاني

خَلّيوْني فْ حالي حتّى نَمْشي بْحالي

وُ نْبَرّحْ بْ صُوتْ البَحْرِيَّة 
فْ لَمْراسي

وُ نْڤولْ ما ڤالوا ناسي :

حَيْها يَمُوتْ

دايَمْها يَفوتْ

وُ الثَّايَقْ فيها مَشْموتْ

ساوي ساوي

راهْ هاذْ الحالْ سْكَنِّي وُ دَّانِي

راهْ هاذْ الحالْ سْكَنِّي وُ دَّانِي

المحمدية : أكتوبر 2010

عبد الرحيم لقلع